ಸರ್ಕಾರಿ ಕೆಲಸಕ್ಕಾಗಿ ಜನರ ತೆರಿಗೆ ಹಣದಿಂದ ನೀಡಿರುವ ವಾಹನಗಳು ಇಂದು ಕೆಲ ರಾಜಕಾರಣಿಗಳ ಕೈಯಲ್ಲಿ ಖಾಸಗಿ ವಾಹನಗಳಂತೆ ಬಳಕೆಯಾಗುತ್ತಿರುವ ಆರೋಪಗಳು ಹೆಚ್ಚುತ್ತಿವೆ. 4 ಅಥವಾ 5 ಸೀಟರ್ ಸರ್ಕಾರಿ ಕಾರಿನಲ್ಲಿ ಸಾಮರ್ಥ್ಯಕ್ಕಿಂತ ಹೆಚ್ಚು ಜನರನ್ನು ತುಂಬಿಸಿಕೊಂಡು ರಾಜಕೀಯ ಸುತ್ತಾಟ ನಡೆಸುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಸಂಬಂಧವೇ ಇಲ್ಲದ ಬೆಂಬಲಿಗರು, ಕಾರ್ಯಕರ್ತರು ಹಾಗೂ ಖಾಸಗಿ ವ್ಯಕ್ತಿಗಳನ್ನು ಸರ್ಕಾರಿ ವಾಹನಗಳಲ್ಲಿ ಕೂರಿಸಿಕೊಂಡು ಸಂಚರಿಸುವ ದೃಶ್ಯಗಳು ಸಾಮಾನ್ಯವಾಗುತ್ತಿವೆ ಎನ್ನಲಾಗುತ್ತಿದೆ. ಸುರಕ್ಷತಾ ನಿಯಮಗಳನ್ನು ಕಡೆಗಣಿಸಿ ವಾಹನಗಳಲ್ಲಿ ಅತಿಯಾಗಿ ಜನರನ್ನು ತುಂಬಿಸುವುದು ಅಪಘಾತದ ಅಪಾಯವನ್ನೂ ಹೆಚ್ಚಿಸುತ್ತಿದೆ.

ಸಾಮಾನ್ಯ ಜನರು ಸಣ್ಣ ಟ್ರಾಫಿಕ್ ನಿಯಮ ಉಲ್ಲಂಘನೆ ಮಾಡಿದರೂ ದಂಡ ಹಾಗೂ ಕಾನೂನು ಕ್ರಮ ಎದುರಿಸಬೇಕಾಗುತ್ತದೆ. ಆದರೆ ಸರ್ಕಾರಿ ವಾಹನಗಳ ದುರುಪಯೋಗದ ಬಗ್ಗೆ ಕ್ರಮ ಏಕೆ ಕಾಣಿಸುತ್ತಿಲ್ಲ ಎಂಬ ಪ್ರಶ್ನೆ ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿದೆ.

ಜನರ ಸೇವೆಗೆ ಬಳಸಬೇಕಾದ ಸರ್ಕಾರಿ ವಾಹನಗಳು ರಾಜಕೀಯ ಶೋ ಹಾಗೂ ಪ್ರಭಾವ ಪ್ರದರ್ಶನದ ಸಾಧನಗಳಾಗಬಾರದು ಎಂದು ನಾಗರಿಕರು ಆಗ್ರಹಿಸುತ್ತಿದ್ದಾರೆ.