ಮಂಗಳೂರು: ನಗರದಲ್ಲಿ ಟ್ರಾಫಿಕ್ ಸಮಸ್ಯೆ ಹಾಗೂ ಅನಧಿಕೃತ ಪಾರ್ಕಿಂಗ್ ಬಗ್ಗೆ ಸಾರ್ವಜನಿಕರಿಂದ ಬಂದ ಅನೇಕ ದೂರುಗಳ ಹಿನ್ನೆಲೆ, ಕಳೆದ ಮೂರು ತಿಂಗಳಲ್ಲಿ ಮಂಗಳೂರು ನಗರ ಪೊಲೀಸರು ಟ್ರಾಫಿಕ್ ಶಿಸ್ತನ್ನು ಕಾಪಾಡುವ ಉದ್ದೇಶದಿಂದ ವಿಶೇಷ ಕಾರ್ಯಾಚರಣೆ ನಡೆಸಿದ್ದಾರೆ.

ಈ ಅವಧಿಯಲ್ಲಿ, ರಸ್ತೆ ಬದಿಯಲ್ಲಿ ತಪ್ಪು ಪಾರ್ಕಿಂಗ್, ಡಬಲ್ ಪಾರ್ಕಿಂಗ್, ನೋ ಪಾರ್ಕಿಂಗ್ ಹಾಗೂ ಪಾದಚಾರಿ ಮಾರ್ಗದಲ್ಲಿ ಪಾರ್ಕಿಂಗ್ ಮಾಡಿದ ಪ್ರಕರಣಗಳಲ್ಲಿ 4,793 ವಾಹನ ಮಾಲೀಕರು ಮತ್ತು ಚಾಲಕರ ವಿರುದ್ಧ ಪ್ರಕರಣ ದಾಖಲಿಸಿ ₹23,21,200 ದಂಡ ವಸೂಲಿ ಮಾಡಿದ್ದಾರೆ.

ನಗರದ ಪ್ರಮುಖ ವ್ಯಾಪಾರ ಸಂಕೀರ್ಣಗಳು ಮತ್ತು ದೊಡ್ಡ ಶಾಪಿಂಗ್ ಮಾಲ್‌ಗಳಿಂದ ಉಂಟಾಗುವ ಟ್ರಾಫಿಕ್ ತೊಂದರೆ ನಿವಾರಣೆಗಾಗಿ ಪೊಲೀಸರ ತಂಡ ಸಭೆ ನಡೆಸಿ, ಪಾರ್ಕಿಂಗ್ ಸೌಲಭ್ಯ ವ್ಯವಸ್ಥಿತವಾಗಿರಬೇಕೆಂದು ಸೂಚನೆ ನೀಡಿದೆ. ಈ ಕುರಿತು ನೋಟಿಸ್‌ಗಳನ್ನೂ ನೀಡಲಾಗಿದೆ.

ಅಪಘಾತ ಸಂಭವಿಸುವ ಸಾಧ್ಯತೆ ಹೆಚ್ಚು ಇರುವ ಪ್ರದೇಶಗಳಲ್ಲಿ ವೇಗ ಮಿತಿ ಉಲ್ಲಂಘಿಸಿದ ವಾಹನಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗಿದ್ದು, 562 ಪ್ರಕರಣಗಳಲ್ಲಿ ₹5,62,000 ದಂಡ ವಸೂಲಿಯಾಗಿದೆ.

ಅದೇ ರೀತಿ, ವಾಹನಗಳ ಗಾಜುಗಳಲ್ಲಿ ಕಪ್ಪು ಫಿಲ್ಮ್ ಅಥವಾ ಟಿಂಟ್ ಅಳವಡಿಸಿದ್ದಕ್ಕಾಗಿ 5,865 ಪ್ರಕರಣಗಳಲ್ಲಿ ₹24,85,900 ದಂಡ ವಿಧಿಸಲಾಗಿದೆ. ಸುಪ್ರೀಂ ಕೋರ್ಟ್ ನಿರ್ದೇಶನದಂತೆ, ಇಂತಹ ವಾಹನಗಳಿಂದ ಟಿಂಟ್ ಸ್ಟಿಕ್ಕರ್ ಹಾಗೂ ಕಪ್ಪು ಫಿಲ್ಮ್ ತೆರವುಗೊಳಿಸಲಾಗಿದೆ.