ಬಂಟ್ವಾಳ: ವಿಟ್ಲ ಸಮೀಪದ ಅನಂತಾಡಿ ಗ್ರಾಮದಲ್ಲಿ ಬುಧವಾರ ರಾತ್ರಿ ಗ್ಯಾಸ್ ಸೋರಿಕೆಯಿಂದ ಮನೆಯೊಂದರಲ್ಲಿ ಬೆಂಕಿ ಕಾಣಿಸಿಕೊಂಡ ಘಟನೆ ಸಂಭವಿಸಿದ್ದು, ಯುವಕರ ತಕ್ಷಣದ ಚಾತುರ್ಯದಿಂದ ದೊಡ್ಡ ಅನಾಹುತ ತಪ್ಪಿದೆ. ಈ ಘಟನೆಯಲ್ಲಿ ಮನೆ ಸಾಮಗ್ರಿಗಳು ಹಾಗೂ ವಿದ್ಯುತ್ ಉಪಕರಣಗಳು ಹಾನಿಗೊಳಗಾಗಿವೆ.

ರಾತ್ರಿ ಸುಮಾರು 9.45ರ ಸುಮಾರಿಗೆ ಅನಂತಾಡಿ ಗ್ರಾಮದ ಬಾಬನಕಟ್ಟೆ ಹಿರ್ತಂದಬೈಲು ಎಂಬಲ್ಲಿ ಹೊಸ ಗ್ಯಾಸ್ ಸಿಲಿಂಡರ್ ಅಳವಡಿಸುವ ವೇಳೆ ಈ ಘಟನೆ ಸಂಭವಿಸಿದೆ. ಜಯರಾಜ್ ಎಂಬ ಯುವಕನಿಗೆ ಮುಖ ಮತ್ತು ಕೈಗಳಲ್ಲಿ ಸುಟ್ಟ ಗಾಯಗಳಾಗಿವೆ. ಮನೆಯಲ್ಲಿದ್ದ ಎರಡು ಚಕ್ರ ವಾಹನ ಸೇರಿದಂತೆ ಹಲವು ಉಪಕರಣಗಳು ಹಾನಿಗೊಳಗಾಗಿವೆ.

ಮನೆಯಲ್ಲಿದ್ದ ಜಯರಾಜ್ ಹಾಗೂ ತಾಯಿ ಸುಶೀಲಾ ಗ್ಯಾಸ್ ಮುಗಿದ ಹಿನ್ನೆಲೆಯಲ್ಲಿ ಹೊಸ ಸಿಲಿಂಡರ್ ಅಳವಡಿಸುತ್ತಿದ್ದರು. ಈ ವೇಳೆ ರೆಗ್ಯುಲೇಟರ್ ಸಂಪರ್ಕ ಭಾಗದಿಂದ ಗ್ಯಾಸ್ ಸೋರಿಕೆ ಆಗಿ ಅಡುಗೆಮನೆಯಲ್ಲಿ ಬೆಂಕಿ ಹೊತ್ತಿಕೊಂಡಿತು. ಬೆಂಕಿಯ ತೀವ್ರತೆಯ ನಡುವೆಯೇ ಜಯರಾಜ್ ತಕ್ಷಣವೇ ಸುಡುವ ಸಿಲಿಂಡರ್ ಅನ್ನು ಎತ್ತಿಕೊಂಡು ಮನೆ ಹೊರಗೆ ಹಾಕುವ ಮೂಲಕ ದೊಡ್ಡ ಅನಾಹುತವನ್ನು ತಪ್ಪಿಸಿದರು.

ಅಕ್ಕಪಕ್ಕದ ನೆರೆಹೊರೆಯ ವೇಂಕಪ್ಪ ಪೂಜಾರಿ ಸ್ಥಳಕ್ಕೆ ಧಾವಿಸಿ ತೇವವಾದ ಗೋಣಿ ಚೀಲದಿಂದ ಸುಡುತ್ತಿದ್ದ ಸಿಲಿಂಡರ್‌ನ್ನು ಮುಚ್ಚಿ ಬೆಂಕಿಯನ್ನು ನಂದಿಸಲು ಸಹಾಯಿಸಿದರು. ಇದರಿಂದ ದೊಡ್ಡ ಸ್ಫೋಟ ಸಂಭವಿಸುವುದನ್ನು ತಪ್ಪಿಸಲಾಯಿತು.

ಬೆಂಕಿಯ ತೀವ್ರತೆಯಿಂದ ವಿದ್ಯುತ್ ಉಪಕರಣಗಳು, ಬಾಗಿಲುಗಳು, ಕಿಟಕಿಗಳು ಹಾಗೂ ಎರಡು ಚಕ್ರ ವಾಹನ ಸೇರಿದಂತೆ ಹಲವು ವಸ್ತುಗಳು ಹಾನಿಗೊಂಡಿವೆ.

ಪರಿಶೀಲನೆ ವೇಳೆ ರೆಗ್ಯುಲೇಟರ್ ಅಳವಡಿಸುವ ವೇಳೆ ಲೀಕ್ ತಪ್ಪಿಸಲು ಅಗತ್ಯ ವಾಷರ್ ಅಳವಡಿಸಲಾಗದಿದ್ದುದರಿಂದ ಈ ಅಪಘಾತ ಸಂಭವಿಸಿರುವುದು ತಿಳಿದುಬಂದಿದೆ. ಜಯರಾಜ್ ಅವರ ತಕ್ಷಣದ ಕ್ರಮವು ದೊಡ್ಡ ಸ್ಫೋಟವನ್ನು ತಪ್ಪಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಕುರಿತು ವಿಟ್ಲ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಅನಂತಾಡಿ ಗ್ರಾಮ ಪಂಚಾಯತ್ ಅಧ್ಯಕ್ಷೆ ಸುಜಾತ, ಮಾಜಿ ಅಧ್ಯಕ್ಷರು ಗಣೇಶ್, ಸನತ್ ಕುಮಾರ್ ರೈ, ಗಣೇಶ್ ಬಂಟ್ರಿಂಜ್, ಉಮೇಶ್ ನೆಡ್ಯಾರ್, ಗ್ರಾಮ ಲೆಕ್ಕಾಧಿಕಾರಿ ಹಾಗೂ ಬಂಟ್ವಾಳ ಕರಿಂಜಶ್ವರ ಗ್ಯಾಸ್ ಏಜೆನ್ಸಿಯ ಕರೂಣಾಕರ್ ಶೆಟ್ಟಿ ಸ್ಥಳಕ್ಕೆ ಭೇಟಿ ನೀಡಿ ಪರಿಹಾರ ಕ್ರಮಗಳನ್ನು ಭರವಸೆ ನೀಡಿದ್ದಾರೆ.