ಮುಂಬೈ: ಮಹಾರಾಷ್ಟ್ರದ ಪಾಲ್ಘರ್ ಜಿಲ್ಲೆಯ ನಲಸೋಪಾರಾದಲ್ಲಿ 31 ವರ್ಷಗಳ ನಂತರ ಕೊಲೆ ಪ್ರಕರಣದಲ್ಲಿ ಬೇಕಾಗಿದ್ದ ವ್ಯಕ್ತಿಯನ್ನು ಮುಂಬೈ ಪೊಲೀಸರು ಬಂಧಿಸಿದ್ದಾರೆ ಎಂದು ಮಾಹಿತಿ ತಿಳಿದು ಬಂದಿದೆ.

ಈಗ 62 ವರ್ಷ ವಯಸ್ಸಿನ ದೀಪಕ್ ಭಿಸೆ ಎಂಬ ವ್ಯಕ್ತಿ 1989 ರಲ್ಲಿ ರಾಜು ಚಿಕ್ನ ಎಂಬಾತನನ್ನು ಕೊಂದು, ಧರ್ಮೇಂದ್ರ ಸರೋಜ್ ಎಂಬಾತನನ್ನು ಕೊಲೆ ಮಾಡಲು ಯತ್ನಿಸಿದ್ದ ಎಂದು ಸುದ್ದಿ ಸಂಸ್ಥೆ ಪಿಟಿಐ ವರದಿ ಮಾಡಿದೆ. ರಾತ್ರಿ ಅವರನ್ನು ಬಂಧಿಸಲಾಗಿದೆ ಎಂದು ಅಧಿಕಾರಿ ತಿಳಿಸಿದ್ದಾರೆ.

ಅಧಿಕಾರಿಯ ಪ್ರಕಾರ, ಭಿಸೆಗೆ 1992 ರಲ್ಲಿ ಜಾಮೀನು ನೀಡಲಾಗಿತ್ತು, ಆದರೆ ನ್ಯಾಯಾಲಯದಲ್ಲಿ ಪ್ರಕರಣದ ವಿಚಾರಣೆಗೆ ಆತ ಹಾಜರಾಗಲಿಲ್ಲ. 2003 ರಲ್ಲಿ ನ್ಯಾಯಾಲಯವು ಆತನನ್ನು ತಲೆಮರೆಸಿಕೊಂಡಿದ್ದಾನೆ ಎಂದು ಘೋಷಿಸಿತು ಎಂದು ತಿಳಿಯಲಾಗಿದೆ.

“ಕಾಂದಿವಲಿಯ ಉಪನಗರದಲ್ಲಿರುವ ತುಲಾಸ್ಕರ ವಾಡಿಯಲ್ಲಿರುವ ಭಿಸೆ ಅವರ ನಿವಾಸದ ವಿಳಾಸಕ್ಕೆ ಪೊಲೀಸರು ಭೇಟಿ ನೀಡಿದಾಗಲೆಲ್ಲಾ ಸ್ಥಳೀಯರು ಅವರು ಸಾವನ್ನಪ್ಪಿರಬಹುದು ಎಂದು ನಮಗೆ ಹೇಳುತ್ತಿದ್ದರು, ಆದರೆ ನಾವು ಅವನನ್ನು ಹುಡುಕುತ್ತಲೇ ಇದ್ದೆವು” ಎಂದು ಪೊಲೀಸ್ ಅಧಿಕಾರಿಯೊಬ್ಬರು ಪಿಟಿಐಗೆ ತಿಳಿಸಿದ್ದಾರೆ.

ಹುಡುಕಾಟದ ವೇಳೆ ಪೊಲೀಸರು ಆರೋಪಿಯ ಪತ್ನಿಯ ಮೊಬೈಲ್ ಸಂಖ್ಯೆಯನ್ನು ಪಡೆಯುವಲ್ಲಿ ಯಶಸ್ವಿಯಾಗಿದ್ದರು. ಪೊಲೀಸ್ ತಂಡವು ಆತನನ್ನು ನಲಸೋಪಾರದಲ್ಲಿ ಪತ್ತೆಹಚ್ಚಿ, ಅಲ್ಲಿಂದ ಆತನನ್ನು ಬಂಧಿಸಲಾಯಿತು.

ಭಿಸೆ ಅವರು ತಮ್ಮ ಕುಟುಂಬದೊಂದಿಗೆ ಈ ಪ್ರದೇಶದಲ್ಲಿ ನೆಲೆಸಿದ್ದ ಮತ್ತು ಮರಗಳನ್ನು ಕಡಿಯುವ ಗುತ್ತಿಗೆಯನ್ನು ತೆಗೆದುಕೊಳ್ಳುತ್ತಿದ್ದ ಎಂದು ಅಧಿಕಾರಿಯನ್ನು ಉಲ್ಲೇಖಿಸಿ ಪಿಟಿಐ ವರದಿ ಮಾಡಿದೆ.

“ಈಗ 62 ವರ್ಷ ವಯಸ್ಸಿನ ಆರೋಪಿಯನ್ನು ಬಂಧಿಸಲಾಗಿದೆ. ಹೆಚ್ಚಿನ ತನಿಖೆ ನಡೆಯುತ್ತಿದೆ” ಎಂದು ಕಾಂದಿವಲಿ ಪೊಲೀಸ್ ಠಾಣೆಯ ಸಬ್ ಇನ್ಸ್‌ಪೆಕ್ಟರ್ ನಿತಿನ್ ಸತಮ್ ತಿಳಿಸಿದ್ದಾರೆ.